సా హి త్య గా నం ... సం గీ త , చి త్ర క ళా లో క నం !

28, ఆగస్టు 2013, బుధవారం

శ్రీకృష్ణుడిగా ఎన్టీఆర్ తొలి మెరుపు!

యాబై తొమ్మిదేళ్ళ క్రితం విడుదలైన  ‘ఇద్దరు పెళ్ళాలు’ సినిమాలోని ఓ  డ్రీమ్ సాంగ్ లో ఎన్టీ రామారావు  శ్రీకృష్ణుడి వేషంలో తొలిసారి మెరిశారు. 

తర్వాత  రెండు సంవత్సరాలకు ‘సొంత వూరు’లో కూడా అదే గెటప్ లో కనపడ్డారు.

మరుసటి ఏడాది విడుదలైంది-  ‘మాయాబజార్’!   అమాయకత్వం, చిలిపిదనం, లేతదనం కలిసిన  అసలు సిసలు  వెండితెర  కృష్ణుడు ఆవిర్భవించాడు!  

ఈ పాత్ర తర్వాత ఎన్నిసార్లు వేసినా  ఎప్పటికప్పుడు వైవిధ్యం చూపుతూ , పాత్ర పోషణకు కొత్తందాలు అద్దారు.

పెరిగిన వయసు ప్రభావం అంతగా కనపడనీయకుండా ప్రేక్షకులను అన్నిసార్లూ మెప్పించగలగటం అసాధారణం.

శ్రీకృష్ణ పాత్రపై ఎన్టీఆర్ సాధించిన సాధికారతకూ, అసమాన నటనా వైదుష్యానికీ ఇది తార్కాణం!  

ఈ విశేషాలతో  ఇవాళ ‘ఈనాడు సినిమా పేజీ’లో  నేనో  వ్యాసం రాశాను. 



ఈ కథనంలో ప్రస్తావించినట్టు-  శ్రీకృష్ణ పాత్రలో ఎన్టీఆర్  తొలిసారి  ‘ఇద్దరు పెళ్ళాలు’ సినిమా పాటలో  ఇలా కనపడ్డారు.


మూడేళ్ళ తర్వాత   ‘మాయాబజార్’లో.... చిన్నారి శశిరేఖతో!




ఘంటసాల, లీలలు  శ్రావ్యంగా పాడిన ‘మదిలో హాయీ.. ’ పాటను ఇక్కడ   వీక్షించండి-  వేణువూదుతూ సగం కిరీటంతో  దర్శనమిస్తాడు ఎన్టీఆర్.



                                                 * * *

‘ఇద్దరు పెళ్ళాలు’ వీడియో సీడీ ...  ఓల్గా వీడియోస్ ద్వారా  ఇప్పడు మార్కెట్లో దొరుకుతోంది.

టైటిల్ ని బట్టి  ఈ సినిమాలో  హీరో  ఎన్టీఆర్ కు  ఇద్దరు హీరోయిన్లుంటారని ఎవరైనా అనుకుంటారు.  ఓల్గా వీడియోస్ (పబ్లిసిటీ విభాగం)  వారు కూడా అలాగే అనుకున్నారు. 

కానీ సినిమాలో హీరోయిన్ జమున మాత్రమే ఉంది.  రెండో హీరోయిన్ ఎక్కడా  కనపడలేదు.  (సినిమాను ఫాస్ట్ ఫార్వర్డ్ పెట్టి చూసి వుంటారు). 

మరి సినిమా టైటిల్ ని  ‘జస్టిఫై చేయటం’ ఎలాగో వాళ్ళకు పాలుపోలేదు.  (ఆ బాధ్యత ఏదో  తమమీద ఉన్నట్టు వాళ్ళు ఫీలవటం ఎందుకో!)

చివరికి  ఏం చేశారంటే... జమున బొమ్మనే  వేరేది  తీసుకున్నారు.  ఎన్టీఆర్ బొమ్మకు  రెండో పక్క పెట్టేశారు.  ఇద్దరు జమునల మధ్య ఎన్టీఆర్! 

ఇలా సీడీ కవర్ తయారుచేసి సీడీ విడుదల చేసేశారు. :)

 ఇంతకీ  సినిమాలో ఇద్దరు భార్యలున్నది  ఎన్టీఆర్ కు కాదు;  ఆయన  తండ్రి  పాత్ర  వేసిన  సీఎస్ ఆర్ కు! 

హీరో తండ్రి కోణంలో కూడా  సినిమా టైటిల్ ఉండొచ్చనేది  ఇప్పటి తరానికి అనూహ్యమన్నమాట!   

* * *

రోసారి సినీ శ్రీకృష్ణుడి  దగ్గరకు వద్దాం.

ప్రముఖ పబ్లిసిటీ డిజైనర్  ఈశ్వర్  చిత్రించిన ఈ వర్ణచిత్రం  చూడండి -




గోపికలు చుట్టూ చేరివుండటం  (‘గోపస్త్రీ పరివేష్ఠితో’)  మినహాయిస్తే...   ‘కస్తూరీ తిలకం లలాట ఫలకే...’ వర్ణనలో  ఉన్నట్టే ఉన్నాడు కదూ!  ముక్కు మీద ముత్యమేదీ  (‘నాసాగ్రే నవ మౌక్తికం ’) లేకపోయినా ఈ కృష్ణుడి రూపానికేమీ లోటు రాలేదనుకోండీ.  (అసలది  లేకపోవటమే ఇంకా బాగుంది) .

సరే... 
కొంచెం
క్లోజప్ పెంచి
ఈ బొమ్మను దగ్గరగా  చూద్దాం!






ఆ ప్రసన్నగంభీర వదనం,  లోతైన చూపు ... ఇప్పుడింకా  స్పష్టంగా,  మరింత ఆహ్లాదకరంగా కనిపిస్తున్నాయి కదూ? 

( సమాచారం,  ఛాయాచిత్రాల  సేకరణకు సహకరించిన శ్యామ్ నారాయణ గారికి కృతజ్ఞతలతో...)

7 కామెంట్‌లు:

Unknown చెప్పారు...

చాలా బాగుంది వేణు గారు మీ వ్యాసం. చాలా చాలా మందికి తెలియదు అన్న గారు మాయాబజార్ కు ముందే కృష్ణుడి గా చేసేరు అంటే. పాట కూడా బాగుంది. థ్యాంక్స్ .

జలతారు వెన్నెల చెప్పారు...

చిత్రాలు, మీ వ్యాసం అన్ని చాలా నచ్చాయండి. పోస్ట్ చాలా బాగుంది.

సుజాత వేల్పూరి చెప్పారు...
ఈ కామెంట్‌ను రచయిత తీసివేశారు.
వేణు చెప్పారు...

@ Uma Yeluri : ఈ పాటను యూట్యూబ్ లో అప్ లోడ్ చేద్దామనుకున్నాను. చూస్తే ఈ నెల మొదటి వారంలోనే ఓల్గా వీడియోస్ వారు అప్ లోడ్ చేసి, నా శ్రమ తగ్గించారు. మీ స్పందనకు థాంక్యూ.

@ జలతారు వెన్నెల: పోస్టుపై మీ అభిప్రాయానికి థాంక్యూ అండీ.

@ సుజాత : ఔనండీ. సినిమా పేజీలో ఇది తొలి వ్యాసం. థాంక్యూ !

రామ్ చెప్పారు...

కృష్ణాష్టమి సందర్భం గా సినిమా కృష్ణుడి పుట్టు పూర్వోత్తరాల పై మీ పరిశోధన బాగుంది .

'దైవం మానుష రూపేణా ' .. కి రివర్సు అయినా -'మనిషి దైవం రూపం గా' మారటం కూడా అంత తేలికయిన విషయం ఏమీ కాదు . మీ పరిశోధన వల్ల దీని వెనకాల ఎందరి కృషి ఉందో తెలిసింది. వీళ్ళందరూ చేసిన మార్పుల గురించీ మీ వివరణ బాగుంది .

తొలిసారి కృష్ణుడు , పెదాల పై వేణువు ధరించిన భంగిమ కూడా అంత బాగాలేదు అనిపించింది. మాయాబజారు తరవాతి కృష్ణుడు ( కేవలం అన్న గారి గురించే ఈ సంగతి) ఇలాంటి భంగిమ లో ఎక్కువ గా చూసిన గుర్తు లేదు . చేతి లో మంత్రం దండం లాగ విన్యాసాలు చేయడమే ఎక్కువ గుర్తు . ఈ భంగిమ లో సొగసరి గానే తప్ప గడసరి గా అనిపించక పోవటం కారణం కావచ్చునేమో !!

ఇద్దరు పెళ్ళాలు’ వీడియో సీడీ కవర్ పేజీ కథ గురించీ "హీరో తండ్రి కోణంలో కూడా సినిమా టైటిల్ ఉండొచ్చనేది ఇప్పటి తరానికి అనూహ్యమన్నమాట! " అన్న మీ పరిశీలన గొప్ప గా ఉన్ది.

వేణు చెప్పారు...

రామ్ గారూ,
పరిశోధన అనేది పెద్దమాట. సేకరించినవాటిని క్రోడీకరించటమే నేను చేసింది.

>> చేతిలో మంత్రందండం లాగ విన్యాసాలు చేయడమే ఎక్కువ గుర్తు >> నిజమే. ఆ భంగిమ తర్వాత ఏ సినిమాలోనూ చూసిన గుర్తు లేదు. పాత్రపై అధికారం వచ్చాక, వేణువును పట్టుకునే పద్ధతిలోనూ మార్పొచ్చిందన్నమాట. మీ వ్యాఖ్య ద్వారా ఈ కొత్త కోణం అర్థమైంది నాకు.

థాంక్యూ!

GKK చెప్పారు...

వేణుగారు: బాగుంది. ఈశ్వర్ గారి చిత్రం అత్యద్భుతంగా ఉంది. NTR రూపం పుంసాం మోహన రూపాయ అన్నట్టుగాఉంది. ఆధునిక చిత్రకళ పేరుతో పిచ్చిబొమ్మలు గీసేవారు ఇటువంటి సజీవచిత్రాలను అసలు గీయగలరా అనిపిస్తుంది. ఎందుకో కానీ modern art కంటే చిన్నపిల్లలు వేసే బొమ్మలే నచ్చుతాయి నాకు.