సా హి త్య గా నం ... సం గీ త , చి త్ర క ళా లో క నం !

30, జూన్ 2014, సోమవారం

వేణువే అంత!


టైటిల్ చూడగానే...  ఇదేదో  ఈ బ్లాగు గురించి రాసుకున్న సంగతేమో  అనుకునే అవకాశం ఉంది కదూ?

కానీ కాదు!   

ఇదో కవిత.

సంగీత పరికరమైన  వేణువు  ప్రత్యేకత గురించి చెప్పేది కాదిది.

వేణువుకు ప్రతిరూపంగా, పర్యాయపదంగా ప్రసిద్ధికెక్కిన పండిట్ హరి ప్రసాద్ చౌరసియా కళా ప్రతిభకు నివాళులర్పిస్తూ రాసిన కవిత ఇది.



విమర్శకుడూ, కవీ  పాపినేని శివశంకర్ గారు ఎప్పుడో ఇరవై సంవత్సరాల క్రితం రాశారు దీన్ని.

‘సిరివెన్నెల’(1986)  సినిమా ద్వారా అప్పటికే హరిప్రసాద్ చౌరసియా గురించి  తెలుసు.  దాంతో కవిత చదవగానే బాగా నచ్చింది.   ఒకసారి మాత్రమే చదివినప్పటికీ  ఇన్నేళ్ళుగా బాగా గుర్తుండిపోయింది.

 తర్వాతి కాలంలో  ఇళయరాజా- హరిప్రసాద్ చౌరసియాల సమ్మేళనంలో...
 Nothing but wind  అనే అద్భుతమైన ఇన్ స్ట్రుమెంటల్ మ్యూజిక్ పుట్టింది.

 దీనిలో వినిపించే  వేణుగానం గురించి ఎంత చెప్పినా తక్కువే. 

అయినా  ఆయన వేణు గానం గురించి నాలాంటి  ఎవరో చెప్పింది వినటం వేరు.

ఆయన వేణువును నేరుగా ‘వినటం’ వేరు!

‘మోజార్ట్ ఐ లవ్యూ’ అనే భాగం ఇక్కడ  ఇస్తున్నాను.

వినండి... అచ్చంగా చెవుల్లో  అమృతం పోసినట్టే  అనిపిస్తుంది. మరి  నా అనుభవమది!



మళ్ళీ కవిత గురించి...

పాపినేని శివశంకర్ గారు రాసిన ఆ  కవితను మళ్ళీ చదవాలనిపించింది. పాత ఆంధ్రజ్యోతి తేదీ,  సంవత్సరం గుర్తు లేదు.

మరెలా?
పాపినేని గారిని  మెయిల్ ద్వారా కాంటాక్ట్ చేశాను. ఆ వివరాలడిగాను. ఆయన శ్రద్ధగా ఓపిగ్గా  వివరాలు అందించారు.

ఈ కవిత   జనవరి 7, 1994  ఆంధ్రజ్యోతి వారపత్రికలో అచ్చయిందని తెలిపారు.  అంతే కాదు; ఆ  కవిత కాపీని కూడా పంపించి సంతోషపెట్టారు! 

ఆ రకంగా చాలాకాలం తర్వాత ఈ కవితను మళ్ళీ చదవగలిగాను.
 
ఈ కవిత పాపినేని గారి  ‘ఆకుపచ్చని లోకంలో` కవితా సంపుటిలో వేశారనీ, ఇది ఆంగ్లం లోకి కూడా అనువాదమైందనీ కూడా తెలుసుకున్నాను.

కవిత్వాన్ని గానీ, జోకును గానీ చెప్పి ఊరుకోవాలి తప్ప,  వివరించటానికి ప్రయత్నించకూడదు.

అందుకే ఈ కవితను ఇక్కడ ...scribd లో   ఇస్తున్నాను. ఎవరికి వారు చదివి ఆనందించటానికి!




ఇది చదివితే ...

హరిప్రసాద్ చౌరసియా  వేణుగాన మహిమ తెలిసినవారికి  మళ్లీ ఆ మాధుర్యం  తలపులోకి రాకమానదు.

చౌరసియా  చేతిలోని ఆ  ‘కోటి ప్రకంపనల మధుర పరికరం’  లోంచి గానం పొంగిపొరలి  ‘ఎక్కడో రహస్యపు పొరల్లో   అద్భుత జీవరసాయన సమ్మేళనం’ జరిగి  వింటున్నవారిని  ‘ఆనందమై వేధిస్తుంది’ !

4 వ్యాఖ్యలు:

puranapandaphani చెప్పారు...

మాలికలో మీ తాజా వ్యాసం టైటిల్‌ చూడగానే మంచి టీజర్‌ అనుకుని నవ్వుకున్నా... వ్యాసం ఓపెనింగ్‌లో మీరు అదే వివరణ ఇచ్చారు....
90ల తొలినాళ్ళలో ఇండియాటుడే వాళ్ళు మ్యూజిక్‌ టుడే సీరీస్‌లో రిలీజ్‌ చేసిన ఒక హరిప్రసాద్ చౌరసియా క్యాసెట్‌ కొన్నాను... ఓ ఐదారేళ్ళు నలిగిపోయిందది. ఇప్పుడు ఎక్కడుందో ఏమో...
శివశంకర్‌ కవిత చదువుతూ ఇళయరాజీయం వింటూ చౌరసియాని తలచుకుంటూ కాసేపు రసిక్‌ బల్‌మాగా మారిపోయాను. ధన్యవాదాలు.

తెలుగు అభిమాని చెప్పారు...

వేణువే అంత, ఆనందమై వేధిస్తుంది- ఇదొక్క వాక్యంతోనే కవిత భావం సూటిగా చెప్పారు పాపినేని శివ శంకర్.

minimalist designing కు ప్రతీక వేణువు. can't find a musical instrument simpler than a flute.

బాగుంది వేణుగారు.

వేణు చెప్పారు...

@ puranapandaphani: ఇండియా టుడే మ్యూజిక్ సిరీస్ లో నేనూ ఒకటి రెండు చౌరసియా వేణువు క్యాసెట్లు కొ(వి)న్నాను. మీ స్పందనకు థాంక్యూ.


@ తెలుగు అభిమాని: ఔనండీ. ఇంత సింపుల్ గా తయారయ్యే సంగీత పరికరం మరొకటి కనపడదు. థాంక్యూ.

Syamala Madduri చెప్పారు...

నేనుకూడా పాపినేనిగారి కవిత్వాభిమానిని!హరిప్రసాద్ చౌరాసియా గారిి వేణుగానం ఆనాటి బృందావనిలోశరచ్చంద్ర చంద్రికల ధవళ కాంతులనద్దుకున్న నల్లని
చల్లని యమునా తరంగాలపై జారిపడ్డ రాధామనోహరుని జిలిబిలిపెదవుల రాగధారలను ఒడిసిపట్టి మనకందించినట్లుంటుంది!వేణువుపై మీవేణువు అందించిన కవిత మీబ్లాగు ఎంతో బాగున్నాయి!ధన్యవాదాలు